Aste bukaeran kontzertuen
eskaintza oso zabala izan da inguruan, BIME festibala Bilbon, Jazpana
Beasainen, Depedro eta MobyDick Azpeitiko San Agustinen, … Eta guk ere aprobetxatu dugu kontzertu
batzuetaz gozatzeko.
Hasteko, Garoa Liburudendan
Paperezko kontzertuetako beste denboraldi berri bat estreinatu zuten, Jurgi
Ekizarekin, eta berritasun moduan egun aldaketarekin. Orain arte Zarauzko
Garoan igande goizetan izaten ziren kontzertuak, eta aurtengoan aldiz
larunbat eguerdian izango dira. Eta lehenengo saiorako Jurgi Ekiza izan zen
gonbidatua, Willis Drummond taldeko abeslaria, bere kitarra akustiko,
pedal eta loop stationarekin bakarkako bere lana taularatzen. Aurkezlea Leire
Palacios izan zen, eta ostiralean ere saio berdina egin zutenez Donostiako
Garoan, momentu batzuetan bazirudien aurkezleak eta abeslariak bezperako
saioarekin jarraitzen zutela naiz eta eguna, tokia eta entzuleak ezberdinak
izan.
Jurgi Ekizak ahots berezia duela erakutsi
zuen, eta falseteekin jolasten momentu interesgarriak utzi zituen. Diska
Bonberenean grabatu du Txapekin, eta grabazioan asko ikasi duela esan zuen.
Bere diskako laupabost kanta abestu zituen, Willisen lehenengo diskako beste
kantu bat, Laboari omenladitxo bat ere egin zion, eta liburu denda batean zenez
kontzertua, Jose De La Serna poeta mexikarrak berak irakurritako poesia batekin
ere egin zuen kantu bat.
Larunbat gauen, aldiz, Hotz
Zarautzek errefuxiatuen alde antolatutako Ttantaka jaialdiaren barruan, Doctor
Deseo azpalditik ezagutzen dugun taldearen kontzertuan izan ginen. Hotz haundia
egiten zuen ikastolako pistan, baino jendea gogotsu zegoen Doctor Deseo
entzuteko. Zer esan talde bilbotarrari buruz. Urteak pasatzen dira, taldekide
batzuk aldatzen dira, baino hor jarraitzen dute Josik baxuan eta batez ere
Francisek, showman bat dela demostratuz, bere ahots ezaguterrezarekin. Batez
ere aspaldiko kantak abestu zituzten, naiz eta abesti hauetan moldaketa batzuk egin eboluzio bat
justifikatzeko. Aldiz, arraroa egin zitzaigun, urrian bertan Kilometroak
jairako kontzertu osoa euskaraz prestatu ondoren, Zarautzen kantu bakar
bat abestea euskaraz. Dena den,
entzuleek oso gustora amaitu zuten kontzertuarekin.
Igande arratsaldean, berriz,
Donostiko bidea hartu genuen. Donostia 2016k antolatutako Bidea ekimenaren
amaiera aprobetxatuz, jai bat antolatu zuten Boulevardean, eta bertan hiru
kontzertu izan ziren, tartean Liher taldearena.
Lide Hernandoren bakarko maketa ezagutzen genuen, eta bere ahotsak txundituta
utzi gintuen. Orain diska atera du rock taldeko formatuan. Normalean bakarka
ibiltzen diren abeslariek, talde bat osatzerakoan talde suabe bat antolatzen
dute, baino Liherren kasuan taldea oso kañeroa da. Iñigo Etxarrik jotzen du kitarra eta Joshka Natkek baxua. Baterian aldaketak izango
ditu taldeak, eta aldaketa hauek finkatu bitartean Ander Zulaika bateriajole
zarauztarra izan zen atzo Liher taldearekin, berak duen trebetasuna azaltzen
musika estilo ezberdinetara egokitzeko (Lou Topet, Tik Tara, Makala Jazz Funk
Band, Bluestock, Zarauzko Musika Banda, …).
Ikusteko zegoen nola moldatuko zen Lide, edo
ea taldearen musika indartsuak Lideren ahotsa zerbait tapatuko zuen. Baino ez
zen horrela gertatu. Atzo Lidek demostratu zuen baduela ahotsa talde osoaren
gainetik nabarmentzeko. Bere ahotsa oso argia da, oso ondo ahozkatzen du,
kriston potentzia dauka, eta nota guztiak oso ondo afinatzen ditu. Badu aukera ibilbide luze eta oparo bat
izateko, bai bakarka edo bai taldean. Orain arte hartu dituen erabakiak bide
honetik eraman dute, eta diskaren aurkezpen biran ere nahiko kontzertu
badituzte lotuta. Ea aurrerantzean ere erabaki zuzenak hartzen dituen eta zorte
pixkat duen, hori ere lagungarria izaten da eta.
